ЭҮЖӨБОЖ Долбоору жергиликтүү кеңештердин депутаттыгына талапкер жаштарга жана аялдарга консультациялык колдоо көрсөтүүнү улантууда.

2021-жылдын 4-мартында Аялдар жана жаштар үчүн болочок депутаттын Мектебинин¹ алкагында кезектеги онлайн-консультациясы өттү. Буга чейин түзүлгөн графикке ылайык, тренерлер жана Мектептин² 21 катышуучусу талапкерлерди көрсөтүү жана каттоо процессинде келип чыккан маселелерди талкуулашты. 

Анара МУСАЕВА, Мектептин тренери: “Биздин жолугушууларыбыздын максаты – жергиликтүү кеңештерге шайлоодо болочок аял депутаттардын мүмкүнчүлүктөрүн жогорулатуу. Бул үчүн биз аларга алдыдагы шайлоого даярдоонун жүрүшүндө пайда болгон маселелер боюнча кеп-кеңештерди берүүдөбүз. Талапкерлердин өтүнүчү боюнча, биз аларга шайлоо программаларын даярдоого да жардам берип жатабыз”.

Жолугушуунун жүрүшүндө катышуучулар аларды кызыктырган бир катар суроолорго жооп алышты. Мисалы, шайлоого байланыштуу ыйгарым укуктары токтогондон кийин негизги ишинде калыбына келүүнүн мөөнөттөрүнө; жергиликтүү кеңештин депутаттыгына талапкерлердин кызмат орундарын жана эмгек акыларын сактоого; шайлоо процессинде фондду толтуруу мүмкүнчүлүгүнө жана башкаларга байланыштуу суроолорго жооп алынды. Ошондой эле катышуучулар жана тренерлер жергиликтүү кеңештердин депутаттыгына талапкерлерди каттоо процессинде жеринде пайда болгон көйгөйлөрдү, анын ичинде төмөнкүлөрдү талкуулашты: БШК кызматкерлеринин даярдыгынын жана компетенциясынын жетишсиздиги; эркектер тарабынан, кээде аялдар тарабынан да эмоционалдык кысым; талапкерлердин өзүнө ишенбегени.

Жолугушуунун аягында катышуучулар жардам үчүн ыраазычылыгын билдиришип, практикалык билимдин жана көндүмдөрдүн пайдасын белгилешти.

МААЛЫМАТ ҮЧҮН: Мектептин катышуучуларына берилген консультациялык жардамдын алкагында 29 аял жергиликтүү кеңештин депутаттыгына талапкер болуп каттоодон өтүштү, дагы 6 аял күзүндө өтчү шайлоого катышууга ниеттенүүдө. Жалпысынан Мектептин 35 катышуучусунда мыйзамдар менен берилген 30 пайыздык квотасынан пайдаланып, жергиликтүү кеңештин депутаты болууга чоң мүмкүнчүлүктөрү бар. 

_________ 

¹ Аялдар жана жаштар үчүн болочок депутаттын мектеби – бул “Элдин үнү жана ЖӨБ органдарынын жоопкерчилиги: бюджеттик процесс” Долбоорунун демилгеси. Аталган Долбоорду Швейцариянын Өнүктүрүү жана Кызматташтык боюнча Башкармалыгы (SDC) аркылуу Швейцария Өкмөтү каржылайт жана Өнүктүрүү саясат институту ишке ашырат. Мектептин алкагында берилген жардам тууралуу толук маалыматты бул жерден окуңуз: http://myktyaimak.gov.kg/events/single-event?id=9  

² Долбоордун консультанттары: Балакунова Айнура, Мусаева Анара, Мамыралиева Нуржан.