Гуляим ШАМШИДИНОВА, ЭҮЖӨБОЖ Долбоорунун мыкты практика боюнча адиси

Өнүктүрүү саясат институту “Элдин үнү жана жергиликтүү өз алдынча башкаруу органдарынын жоопкерчилиги: бюджеттик процесс” Долбоорунун (мындан ары – ЭҮЖӨБОЖ Долбоору) алкагында жыл сайын “Жергиликтүү демилге” конкурстарын (мындан ары – ЖД Конкурсу) өткөрүп келди. ЭҮЖӨБОЖ Долбоорун Швейцариянын Өнүктүрүү жана кызматташтык агенттиги аркылуу (SDC) Швейцария Өкмөтү каржылайт жана Өнүктүрүү саясат институту аткарат. ЖД Конкурсунун негизги максаттары: 1) калкты жамааттын жашоосуна жана жеринде чечим кабыл алуу процессине дагы да жигердүү катышууга шыктандыруу; 2) жергиликтүү демилгелерге дем берип, алар тууралуу маалыматты жайылтуу максатында жергиликтүү маанидеги маселелерди чечүүдө жергиликтүү демилгелерди ишке ашыруу боюнча өзгөчө ийгиликтүү мисалдарды аныктоо; 3) Кыргызстанда ЖӨБ органдары менен жергиликтүү жамааттын өнөктөштүгүндө жергиликтүү маанидеги маселелерди чечүүнүн алдыңкы усулдарын жана жаңы ыкмаларын колдонууга көмөктөшүү. 2012-жылдан 2019-жылга чейинки мезгил аралыгында конкурска 473 өтүнмө түшүп, 154 өтүнмө жалпы суммасы 5 234 500 сомду түзгөн байгелерге ээ болду.

Бул макалада ЖД Конкурстарында жеңүүчү деп табылган демилгелердин жыйынтыгы кандай болгонун, алар кантип өнүгүп, элге кандай пайда алып келип жатканын, бул долбоорлордун туруктуулугу жана алардын келечекке карата пландары тууралуу сөз кылабыз.

Ар бир окуяда ЖД лидерлери алынган жыйынтык тууралуу маалымат менен бөлүшүп, жабдуу же социалдык объекттерди көрктөндүрүү түрүндө алган байгелерди канчалык натыйжалуу колдонуп жатканын, өз ишинде кандай оң тенденциялар байкалганын, жергиликтүү жамаат болуп жаткан өзгөрүүлөргө кандай реакция жасаганын, булардын тажрыйбасы муниципалитеттин аймагында да, анын тышында да кантип жайылганын айтып беришти.

Бул жергиликтүү демилгелер башка долбоорлордун пайда болушуна шарт түзүп, үлгү, мисал катары каралып калды.