ЖӨБ органдарына кеп-кеңештерди КР ЖӨБ Союзунун адистери Данияр АЙТБАЕВ (жооптор) жана Венера БОЛТОБАЕВА (консультациялар) беришти.

СУРОО. Айыл өкмөтүнүн башчысы жергиликтүү кеңештин депутаттыгына талапкерлигин коюп, депутат болуп шайланды. Эми айыл өкмөт башчы кызмат ордун бошотуу боюнча арыз жазышы керекпи? 

ЖООП. Шайлоонун жыйынтыктары аймактык шайлоо комиссиясы тарабынан аныкталып, ал чечим БШК тарабынан бекитилип, жалпыга маалымдоо каражаттарына расмий жарыялоо болгондон кийин, шайланган жаран 3 күндүн ичинде кайсыл кызматта иштээрин тандашы керек болот.  Эгерде шайланган жаран депутаттык кызматты тандаса, анда ал жаран “Жергиликтүү өз алдынча башкаруу жөнүндө” Мыйзамдын 49-беренесинин 7-бөлүгүнүн 1-пунктуна ылайык, акимдин атына “башка ишке өткөндүгүмө байланыштуу айыл өкмөт башчысы кызмат ордунан өз каалоомдун негизинде бошотууну суранам” деп арыз жазышы керек.

СУРОО. Айылдык кенештин депутаты муниципалдык тазалык ишканасында бухгалтер болуп иштегенге мыйзам жол береби?

ЖООП. Бухгалтердин кызмат орду техникалык тейлөөчү кызматкерлердин катарына киргендиктен, алар муниципалдык кызматкер болуп эсептелишпейт. Ошондуктан, жергиликтүү кеңештин депутаты болгон учурда деле өзүнүн ыйгарым укуктарын өндүрүштүк же кызматтык ишинен кол үзбөстөн жүзөгө ашыра алат.