Жоопторду КР Жергиликтүү өз алдынча башкаруулар Союзунун юристтери даярдашты

Эгерде айыл өкмөтүнүн башчысынын орун басары – жооптуу катчы эмгек өргүүсүнө чыкса, анын кызматтык милдеттерин айылдык кеңештин жооптуу катчысы убактылуу аткара алабы? 

Жооп: Айыл өкмөтүнүн башчысынын орун басары – жооптуу катчы эмгек өргүүсүнө чыкса, анын милдеттери бекитилген кызматтык нускамага ылайык айыл өкмөтүнүн штаттык кызматкерине жүктөлөт. Ошол эле учурда бул милдеттерди айылдык кеңештин жооптуу катчысына жүктөөгө болбойт, себеби айыл өкмөтү менен айылдык кеңеш эки башка юридикалык орган болуп саналат.

Эгерде контракт менен иштеген кызматкер айыл өкмөтүнүн ички кадрдык резервине киргизилип, ошол жерден кызматка дайындалса, анда ал кайсы учурдан баштап эмгек өргүүсүнө чыга алат?

Жооп: КР Эмгек кодексинин 72-беренесине ылайык, иштеген ишинин биринчи жылы үчүн өргүүнү пайдалануу укугу кызматкердин ошол уюмда үзгүлтүксүз иштегенине 11 ай толгондо пайда болот. 
Эгерде кызматкер келишимдин (контракттын) негизинде иштесе жана ошол эле органдын ички резервинен дайындалса, анда ал буга чейин бекитилген өргүүлөрдүн графиги боюнча эмгек өргүүсүнө чыга алат. Бирок, мындай учурда кызматкер толук эсептешүү менен буга чейинки жумушунан бошотулбашы керек.
Эгерде кызматкер биринчи жумушунан бошотулганда жана андан кийин гана жаңы кызматка дайындалгандан кийин толук төлөм алган болсо, анда ал жаңы кызматта 11 ай үзгүлтүксүз иштегенден кийин гана өргүүгө чыгууга укук алат.

Учурда айыл өкмөтүндө иштейм, эки жаштагы балам бар. Балам үч жашка чыкканга чейин менин бала багуу боюнча төлөнбөгөн өргүүгө укугум барбы?

Жооп: КР Эмгек кодексинин 80-беренесине ылайык, кызматкерге анын арызы боюнча баласы 3 жашка толгонго чейин бала багуу боюнча эмгек акысы сакталбаган кошумча өргүү берилет. Тараптардын макулдашуусу боюнча мындай өргүү каалаган убакта жана ар кандай узактыкта берилиши мүмкүн.
Кызматкер баласы үч жашка толгонго чейин бала багуу боюнча өргүүнү толук же бөлүп-бөлүп пайдалана алат.
Айыл өкмөт башчысына расмий арыз менен кайрылып, балаңыз үч жашка чыкканга чейин эмгек акысы сакталбаган өргүүгө чыга аласыз.