Жаңылыктар түрмөгү Асел АКМАТАЛИЕВА жана Нургүл ЖАМАНКУЛОВА тарабынан даярдалды

2023-жылдын сентябрь айында Борбордук Азиянын Жергиликтүү башкаруу академиясы (БАЖБА) эки топ үчүн “Жер мыйзамдарынын актуалдуу маселелери” деген темада квалификацияны жогорулатуу курсун өткөрдү. Ар бир курстун узактыгы 24 академиялык саатты түздү.

Курстар элеттик муниципалитеттердин 19 айыл өкмөтүнүн башчыларынын орун басарлары, жерге жайгаштыруу боюнча адистер жана архивариустар жана Кыргызстандын шаар куруу жана архитектура башкармалыгынын райондук (Ноокат) жетекчисинин орун басары үчүн уюштурулду[1].

БАЖБАнын окутуучулары курстун лекторлору болушту:

• Айнур КЕНЖЕБАЕВА, КР ЖӨБ Союзунун жер маселелери боюнча консультанты;
• Гульнура ЖАКЫПБЕКОВА,  КР Айыл чарба министрлигинин Жайыт жана асыл тукум мал чарба департаментинин укуктук маселелер боюнча адиси (жайыт маселелери боюнча юрист);
• Карлыгач КУБАНЫЧБЕКОВА, КР Айыл чарба министрлигинин Жайыт жана асыл тукум мал чарба департаментинин башкы адиси.

Окутуу курсунда жер-укуктук мамилелерди жөнгө салуу, жер участокторун трансформациялоо, жер мунапысы, жайыттарды башкаруу жана пайдалануу чөйрөсүндө мамлекеттик органдардын жана жергиликтүү өз алдынча башкаруу органдарынын ыйгарым укуктарынын жана жоопкерчиликтеринин өңүттөрү жана өзгөчөлүктөрү ж.б. маселелер камтылган.

“Курстун темасы биз үчүн өтө актуалдуу болду, себеби бир нече күн мурун бизге жер комиссиясынын өкүлдөрү текшерүү менен келип кетишкен. Текшерүүнүн жүрүшүндө көптөгөн суроолор пайда болду, ал суроолорго жоопторду биз күтүп турганбыз. Бирок алар консультация алуу үчүн Айнура КЕНЖЕБАЕВАга кайрылыш керектигибизди айтышкан. Анан окууга келгенден кийин биз дал ушул эксперттен билим аларыбызды билип отурбайбызбы! Ушул 3 күндүн ичинде биз жаңы билимге гана ээ болбостон, талкууларга катышып, суроолорубузга жоопторду алдык. Эч нерсе кокусунан болбойт экен!” – деди Кыргыз-Ата айыл өкмөтүнүн башчысынын орун басары Таалайбек САДИРОВ.

“Биздин мугалимибиз практик болуп чыкканы мага чоң таасирин тийгизди. Бүгүнкү күндө мындай нерсени сейрек кездештирип калбадыкпы. Көптөгөн лекторлор жана окутуучулар теорияны практикалык кырдаалдык мисалдар менен бекемдебестен гана үйрөтүшөт. Академияга бул үчүн өзгөчө ыраазычылык билдирем”, – деди Көк-Жар айыл өкмөтүнүн башчысынын орун басары Гүлчынар МАМАТОВА.

Курстун аягында угуучулар квалификацияны жогорулаткандыгы жөнүндө БАЖБАнын лицензияланган сертификаттарын алышты.