Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин Регламенти боюнча комитетке:

• “Жергиликтүү мамлекеттик администрациялар жана жергиликтүү өз алдынча башкаруу органдары жөнүндө” КР Мыйзамынын 27-беренесинде көрсөтүлгөн жергиликтүү маанидеги маселелерге инвентаризация жүргүзүү жана жергиликтүү маанидеги реалдуу жана артыкчылыктуу маселелерди так аныктап алуу. Мындай тактоо жергиликтүү өз алдынча башкаруу органдарынын өз милдеттерин натыйжалуу аткарууга жана жергиликтүү бюджетти пландоонун сапатын жакшыртууга көмөктөшөт;
• ушул эле мыйзамга мыйзамдарга киргизилген акыркы өзгөртүүлөр жана алардын ишинин натыйжалуулугу жөнүндө жергиликтүү кеңештердин депутаттарынын маалымдуулугун жогорулатуу максатында аларды үзгүлтүксүз окутуу механизмин, ошондой эле бул окутууга жергиликтүү бюджеттен каражат бөлүүгө уруксат берүүнү караган ченемдерди киргизүү зарыл;
• мыйзамга жергиликтүү кеңештердин сессияларын онлайн форматта өткөрүүнү жана сессияларга катышуу укугун ишеним кат аркылуу башка депутатка өткөрүп берүүнү чектеген атайын ченемдерди киргизүү зарыл;
• “Мамлекеттик жарандык кызмат жана муниципалдык кызмат жөнүндө” КР Мыйзамына өзгөртүүлөрдү киргизүүнүн натыйжасында эки жылда бир жолу өткөрүлүүчү аттестация жарым жылда бир өткөрүлүүчү баалоого алмаштырылды (11-берене). Бирок, баалоо процессин жакшыртуу максатында баалоонун критерийлери так көрсөтүлгөн эмес, ошондуктан бул критерийлерди тактап, аныктап алуу зарыл;
• “Мамлекеттик жарандык кызмат жана муниципалдык кызмат жөнүндө” КР Мыйзамын Кыргыз Республикасынын Эмгек кодексине шайкеш келтирүү жана кызматкерлердин мотивациясын жогорулатуу максатында кызмат орду убактылуу бош турган кызматкердин функционалдык милдеттерин аткарып жаткан кызматкерге (же кызматкерлерге) кызматтык маянасынын 30 пайыздан кем эмес өлчөмдө үстөк төлөө мүмкүнчүлүгүн кароо зарыл (21-берене);
• “Кыргыз Республикасындагы географиялык аталыштар жөнүндө” КР Мыйзамында көрсөтүлгөндөй, жергиликтүү деңгээлде географиялык объекттерге адамдардын ысымдарын ыйгарууга жана кайталап ыйгарууга тыюу салуу жөнүндө маселени карап чыгуу сунушталат. Бул чара Кыргызстан элинин тарыхынын, маданиятынын жана баалуулуктарынын ажырагыс бөлүгү катары географиялык аталыштарды сактоого, ошондой эле географиялык объекттерге адамдардын ысымдарын жапырт түрдө ыйгаруу практикасын токтотууга багытталган. Мындай өзгөртүү (Мыйзамдын 6-беренеси) улуттук мурас катары жер аталыштарынын маанисин сактап калууга жардам берет жана келечек муундар үчүн тарыхый жана маданий баалуулуктардын так чагылдырылышын камсыз кылат;
• “Жергиликтүү мамлекеттик администрациялар жана жергиликтүү өз алдынча башкаруу органдары жөнүндө” КР Мыйзамынын 50-беренесинде айыл өкмөтүнүн карамагында түзүлгөн же анын башкаруусуна берилген уюмдар, ишканалар жана мекемелер болушу мүмкүн экендигин көрсөткөн ченемди киргизүү зарыл;
• “Жергиликтүү мамлекеттик администрациялар жана жергиликтүү өз алдынча башкаруу органдары жөнүндө” КР Мыйзамында жана КР Граждандык кодексинде учурдагы чакырыктарды жана мезгилдин талаптарын эске алуу менен муниципалдык ишканаларды түзүүнүн жана алардын иштөө тартибин жөнгө салуучу ченемдерди жана механизмдерди караштыруу зарыл.

Агрардык саясат, суу ресурстары, экология жана аймактарды өнүктүрүү боюнча комитетке:

• “Жер-укуктук мамилелерди жөнгө салуу жөнүндө” КР Мыйзамынын 2-беренесинин “Терминдер жана аныктамалар” бөлүмүнө жеке турак жай куруу үчүн жер участокторун бөлүп берүүгө мораторий киргизилгенге чейин жергиликтүү өз алдынча башкаруу органдары же алардын укук мураскорлору чечим кабыл алган жер участоктору үчүн айрым терминдерди же аныктамаларды кароону киргизүү зарыл.
• “Жер участокторун которуу (трансформациялоо) жөнүндө” КР Мыйзамы жер участокторун трансформациялоо жаатындагы ыйгарым укуктарды жүзөгө ашыруу боюнча облустук жана республикалык маанидеги шаарлардын мэрлеринин ыйгарым укуктары бөлүгүнө толуктоолорду киргизүүнү талап кылат. Бул чара мыйзамдын жоболорун КР Жер кодексине шайкеш келтирүүгө багытталган, анда облустук жана республикалык маанидеги шаарлардын мэрлеринин мындай ыйгарым укуктары каралган.

Социалдык саясат боюнча комитетке:

• маданият чөйрөсүндөгү мыйзамдарды административдик-аймактык реформанын жыйынтыгына шайкеш келтирүү зарыл, ага ылайык жергиликтүү бюджеттен каржылануучу маданият кызматкерлерин дайындоо жана бошотуу боюнча функциялар жана ыйгарым укуктар Маданият министрлигинен ЖӨБ органдарына өткөрүлүп берилген.