Артур САРКИСОВ, ӨСИнин байланыш боюнча координатору

24-25-июль күндөрү Балыкчыда шаардык мэриянын аппаратынын адистери, жергиликтүү кеңештин депутаттары, мамлекеттик органдардын аймактык бөлүмдөрү, шаардын коммуналдык кызматтары жана жергиликтүү жамааттын мүчөлөрү үчүн практикалык багыттагы тренинг өттү. Катышуучулар жашыл экономиканы, туруктуу өнүгүүнү жана жергиликтүү шарттарды эске алуу менен социалдык-экономикалык өнүктүрүү программаларын (СЭӨП) сабаттуу даярдаганды үйрөнүштү.

Тренинг маалында катышуучулар шаарды өнүктүрүүнүн артыкчылыктарын талкуулай алышты, СЭӨПны мамлекеттик саясат жана бюджеттик процесс менен байланыштырып, өздөрүнүн пландарынын биринчи долбоорлорун иштеп чыгышты.

Иш шаардын фактылык дайындары менен чакан топтордо жүрдү. Катышуучулар негизги көйгөйлөрдү аныктап, максаттарды туюндуруп, өсүштүн ыктымалдуу багыттарын жана инфраструктуралык чечимдерди талкуулашты.

Окутуу процессинин башталышы ӨСИ, ЕККУ, БАЖБА жана GIZ ортосундагы өз ара байланыштын логикалык кадамы болуп калды. Жашыл экономиканын принциптерин, эл аралык жана регионалдык тажрыйбаны, ошондой эле жергиликтүү жамааттардын катышуусуна коюлган талаптарды эске алган окуу-методикалык материалдар тренингдин алдында иштелип чыгып, окутууга ылайыкташтырылган. 

“ӨСИнин консультанттары катары биз теорияны гана окутуп тим болбостон, ошол эле маалда катышуучулар менен бирге Балыкчы шаарынын жашоого ыңгайлуу жана инвестициялар үчүн жагымдуу болушуна жардам бере турган реалдуу пландарды иштеп чыгуу үчүн шаардын ресурстук базасын да баалап чыктык”, – деп бөлүштү ӨСИнин консультанты Айнура БАЛАКУНОВА.

Шаардын СЭӨПсы бюджетти пландоонун, инвестицияларды тартуунун жана өнүктүрүүнүн артыкчылыктарын макулдашуунун маанилүү каражатына айланууда. Улуттук саясаттын деңгээлинде бул процесске чоң көңүл бурулууда. 

“Бүгүнкү күндө Экономика министрлиги СЭӨПны фактылык жергиликтүү бюджеттер менен байланыштыруунун үстүнөн жигердүү иш алып барууда. Эгерде биз пландар кагаздын бетинде калбашын кааласак, жер-жерлердеги, анын ичинде мэриялардын финансы-экономикалык бөлүмдөрүндөгү адистер мындай документтер менен иштей билгени маанилүү”, – деп белгиледи КР Экономика жана коммерция министрлигинин аймактарды өнүктүрүү саясаты башкармалыгынын жетекчиси Искандарбек МАМАТОВ.

Иш-чара ӨСИнин, ЕККУнун Бишкектеги Программалык кеңсесинин, БАЖБАнын жана GIZдин “Жашыл экономика жана Кыргыз Республикасындагы жеке секторду туруктуу өнүктүрүү” программасынын биргелешкен  демилгесинин бир бөлүгү болуп калды.